{مدخل}
تصدقون كل فترة دراستي الابتدائيه والمتوسطه والثانوي ولا مره رحت زياره مع المدرسه …….
واذكر يومني صغير ( بالابتدائيه تحديدا ) كانو بياخذوني المدرسه مع مجموعة الطلاب المتفوقين لحديقة الحيوانات وباللحظه الاخيره اذكر انهم رفضو ياخذوني انا تحديدا ولليوم مو عارف السبب 
واذكر مره يوم كنت بالابتدائيه جا مدرس وانا كنت ساهي بالفصل ( مو ساهي لكن عندي ثقل خفيف بالسمع ) المهم جا واتكلم ولا عرفت وش قال لكن سمعته يقول يرفع يده الفصل تأخرو برفع ايديهم وبعدين مجموعه من الطلاب رفعوا ايديهم واختار سته من الطلاب واخذهم معاه , وبعد ما طلع سألت زملائي وش السالفه قالو كان يقول عندنا زياره لمصنع البسكوت واللي يحب يروح معانا يرفع يده ( انا انقهرت قلت اول مره تصير اختياري وفاتت على ).
ومن يومها وانا كل سنه دراسيه جديده اقول ياليت يسوون رحله وياخذوني معاهم .
المهم دارت الايام ( على قولت الست ) وصرت مدرس وبعدها دارت الايام ( برضه على قولت الست ) وتم تكليفي بريادة النشاط بالمدرسه وتصدقون من اول اسبوع استلمت الرياده اخذت الطلاب زياره لجامعة الامام بالرياض , وعندي رحله الاسبوع الجاي لجامعة الملك سعود .
المهم واللي يهم انا ماعندي اي مشكله بريادة النشاط الا انني ومن خلال بحثي في هذا المنتدى الرائع استطعت الحصول على الكثير من الفوائد بس المشكله يا اخواني اني للحين مو عارف اوثق اعمالي بصراحه السجلات كثيره متعدده من غير الحقيبه اللي استلمتها من مركز الاشراف 
يا اخوان ابي نصيحة شخص خبره ويفيدني بأختصار بالمهم والاهم في اعمال رائد النشاط والسجلات الضروريه , او انه يعطيني سجل اعتمده ولا يصير جهدي مشتت .
وعسى الله يحفظكم ويرعاكم …
اخوكم ناشط في النشاط.